لو اشتريت باور بانك  10000 mAh عشان تشحن موبايل بطاريته سعة 2500 mAh، هل ده معناه انك تقدر تستخدم الباور بانك 4 مرات للشحن من الصفر% إلى 100%؟

الإجابة قطعًا لا

فيه اختلاف، وسوء فهم في مسألة سعة بطارية الباور بانك، وعدد مرات استخدامه لشحن الموبايل. 

والاختلاف بييجي من حاجتين :  الأولى : أن السعة المعلنة لأي باور بانك هي كمية الكهرباء بداخل بطاريته، وبتتحسب بـ mAh أو ميللي أمبير في الساعة، ولأن بطارية الباور بانك بتشتغل بقدرة 3.7 فولت، في حين أن الموبايل بيشتغل بقدرة 5 فولت، فلازم الباور بانك يحتوي على دائرة لتحويل الفولت من 3.7 إلى 5، وده بيأثر على كمية الكهرباء اللي بتتنقل من الباور بانك للموبايل. 

للإختصار فالمعادلة :(سعة الباور بانك) × 3.7 ÷ 5 = كمية الكهرباء المستخدمة لشحن الموبايل

بمعنى أن الباور بانك 10000 mAh بيدي الموبايل (10000 × 3.7 ÷ 5) = 7400 mAh

وبنفس الطريقة الباور بانك 20000 mAh بيدي الموبايل 14800 mAh فقط

(مع ملاحظة أن mAh أو مللي أمبير في الساعة بتعبر عن كمية الكهرباء في الباور بانك، ومالهاش أي علاقة بسرعة نقل الكهرباء)

برضه الحسبة دي مش هي بس اللي بتحدد السعة الحقيقية للباور بانك.

السبب التاني للأختلاف: هو معدل التحويل أو Conversion Rate، وبإختصار أثناء عملية تحويل الفولت من 3.7 إلى 5، دائرة الباور بانك بتستخدم طاقة، وبينتج عن العملية دي فقد في الحرارة، وده بيأثر على كمية الكهرباء المنقولة من الباور بانك للموبايل، وضيف لده جودة البطارية، والدوائر الكهربائية، والكابل المستخدم لعملية الشحن نفسه، وعمومًا فبعض الماركات الكبيرة بتعلن عن المعدل ده زي Cager اللي بتعلن أنه بيصل إلى 93%، وبعض الماركات التانية بيوصل إلى 90%، ودي تعتبر نسبة كويسة جدًا.

بإختصار باختيار نوع مميز من الباور بانك نقدر نقول أنه لسعة 10000 mAh بنقدر ناخد 6882 mAh وده معناه شحن أكتر من مرتين ونص موبايل بطاريته 2500 mAh، ومش 4 مرات. 

وبناء عليه، فعند اختيارك للباور بانك، لازم تاخد في اعتبارك القدرة الحقيقية اللي حتشحن بيها الجهاز، واحتياجك الفعلي، وده بيتوقف طبعًا على عدد الأجهزة المطلوب شحنها، ونوعها (موبايل أو تابلت)، وعدد المرات المطلوب شحنها فيها.